खून, मोक्का प्रकरणातील एका आरोपीस जामीन मंजूर, भुईंज येथील ओंकार चव्हाण खून प्रकरण

अजय संकपाळ, क्राईम ब्युरो चीप, महाराष्ट्र माझा न्युज नेटवर्क

वाई:- दिनांक ४ जानेवारी २०२१ रोजी भुईंज तसेच वाई येथील काही युवकांनी संगनमत करुन मयत इसम नामे ओंकार चव्हाण यास जीवे ठार मारुन त्याची बॉडी भुईंज येथील स्मशानभूमीमध्ये जाळून टाकून पुरावे नष्ट केल्याचे आरोप या गुन्ह्यात अटक असलेल्या आरोपींवर होते. सदर घटनेबाबत भुईंज पोलिस स्टेशन येथे गुन्हा दाखल झाल्यानंतर जानेवारी तसेच फेब्रुवारी व मार्च २०२१ मध्ये संशयित आरोपी अनिकेत उर्फ बंटी नारायण जाधव सह एकूण १९ आरोपींना अटक करण्यात आली होती.

तदनंतर सदर प्रकरणातील सर्व आरोपींवर महाराष्ट्र संघटित गुन्हेगारी नियंत्रण कायदा ( MCOCA ) अंतर्गत कारवाई करण्यात आली होती. या प्रकरणामध्ये अटक असलेला १६ नंबर चा संशयित आरोपी म्हणजेच रोहित कचरे उर्फ काच्या रा. वाई याने मुंबई उच्च न्यायालयात जामीन अर्ज दाखल केला होता.

अर्जदार / संशयित आरोपी नामे रोहित हा घटनास्थळी हजर असल्याबाबत आरोप त्याच्यावर होते. सदर संशयित आरोपीने मयत इसमाला व जखमी साक्षीदारांना मारहाण केलेला उल्लेख साक्षीदारांच्या जबाबात नाही तसेच सदर आरोपीस तपासादरम्यान झालेल्या ओळखपरेड (TIP) मध्ये प्रत्यक्षदर्शी साक्षीदारानी आरोपीस ओळखले नसून इतर कोणतेही सुसंगत पुरावे आरोपीच्या विरोधात नाहीत , तसेच फिर्याद (FIR) मध्ये देखील अर्जदार रोहित याचे नाव नाही असा युक्तिवाद संशयित आरोपी / अर्जदार रोहितच्यावतीने करण्यात आला.

आरोपीच्या वतीने केलेला युक्तिवाद ग्राह्य धरून मे. न्यायालयाने काही अटी व शर्तींवर आरोपीस जामीन मंजूर केला असून संशयित आरोपीच्या वतीने ॲड.शैलेश धनंजय चव्हाण, ॲड. प्रथमेश अनिल बनकर यांनी जामीन अर्ज दाखल केला होता.