महाराष्ट्र माझा न्युज नेटवर्क
फलटण — शिक्षण क्षेत्रात गेल्या अनेक वर्षांपासून भरीव, गुणवत्तापूर्ण आणि समाजाभिमुख कार्य करणाऱ्या डॉ. वैशाली विजय शिंदे यांची भारत गौरव रत्न श्री सन्मान कौन्सिल (भारत सरकारमान्य संस्था) यांच्यावतीने प्रदान करण्यात येणाऱ्या प्रतिष्ठेच्या ‘राष्ट्रीय अशोक सन्मान’ पुरस्कारासाठी निवड करण्यात आली आहे.
शिक्षण क्षेत्रातील त्यांचा प्रदीर्घ अनुभव, विद्यार्थीकेंद्री दृष्टिकोन, शैक्षणिक गुणवत्ता वृद्धिंगत करण्यासाठी केलेले प्रयत्न तसेच समाजघडणीतील त्यांचे मोलाचे योगदान याची दखल घेऊन हा बहुमान जाहीर करण्यात आला आहे.हा मानाचा पुरस्कार दि. ३१ मार्च २०२६ रोजी आयोजित करण्यात येणाऱ्या वर्ल्ड ह्युमन राइट्स प्रोटेक्शन कमिशन (WHRPC) च्या मेंबरशीप सेमिनार व पुरस्कार वितरण सोहळ्यात प्रदान करण्यात येणार आहे.
या भव्य कार्यक्रमास देश-विदेशातील मान्यवर व्यक्तिमत्त्वे, आंतरराष्ट्रीय राजदूत, विविध देशांचे प्रतिनिधी, सरकारी मंत्री, सामाजिक व मानवाधिकार कार्यकर्ते तसेच बॉलिवूड व कला क्षेत्रातील नामवंत उपस्थित राहणार आहेत. त्यामुळे हा सोहळा जागतिक स्तरावरील मान-सन्मानाचे महत्त्वपूर्ण व्यासपीठ ठरणार आहे.या कार्यक्रमाच्या निमित्ताने डॉ. वैशाली विजय शिंदे यांची वर्ल्ड ह्युमन राइट्स प्रोटेक्शन कमिशन (WHRPC) च्या राष्ट्रीय उपाध्यक्षपदी नियुक्ती करण्यात आल्याचीही अधिकृत घोषणा करण्यात आली आहे.
यासोबतच त्यांना WHRPC ची आजीवन सदस्यता प्रदान करण्यात येणार असून, मानवाधिकार संरक्षण, सामाजिक न्याय, शिक्षणातील समानता आणि महिलांच्या सक्षमीकरणासाठी कार्यरत असलेल्या आंतरराष्ट्रीय नेतृत्वाच्या समूहात त्या सक्रिय भूमिका बजावणार आहेत.भारत गौरव रत्न श्री सन्मान कौन्सिल ही भारत सरकारद्वारे मान्यताप्राप्त व अधिकृत पुरस्कार प्रदान करणारी संस्था असून, तिचे पुरस्कार कॉर्पोरेट व्यवहार मंत्रालय तसेच कौशल्य विकास व उद्योजकता मंत्रालय यांच्या मान्यतेने प्रमाणित आहेत.
त्यामुळे या पुरस्काराला राष्ट्रीय स्तरावर विशेष महत्त्व प्राप्त झाले आहे.डॉ. वैशाली विजय शिंदे यांना मिळालेला हा सन्मान त्यांच्या शिक्षण क्षेत्रातील निष्ठावंत कार्याची, विद्यार्थ्यांच्या सर्वांगीण विकासासाठी केलेल्या अथक परिश्रमांची आणि समाजहितासाठी दिलेल्या योगदानाची जिवंत पावती आहे. हा गौरव केवळ त्यांच्या वैयक्तिक कर्तृत्वाचा सन्मान नसून, संपूर्ण शिक्षण क्षेत्रासाठी प्रेरणादायी आणि अभिमानास्पद ठरणारा आहे. त्यांच्या या यशाबद्दल विविध स्तरांतून त्यांचे अभिनंदन होत असून, फलटण परिसरातही समाधान आणि गौरवाची भावना व्यक्त होत आहे.
