फलटण प्रतिनिधी:-दहा दिवस भक्तीभावाने बाप्पाचा पाहुणचार केल्यानंतर तालुक्यांत सर्वत्र गणरायाच्या विसर्जन मिरवणुकांचा उत्साह पाहायला मिळाला आहे.”गणपती बाप्पा मोरया, मंगलमूर्ती मोरया, पुढल्या वर्षी लवकर या” अशा गजरात फलटण येथील सार्वजनिक व घरगुती गणपती मूर्तींचे विसर्जन भक्तीभावाने करण्यात आले.
फलटण शहर व तालुक्यात बाप्पाचं धुमधडाक्यात आगमन झालं होत. गेल्या दहा दिवसांपासून सर्वच ठिकाणी गणेशोत्सवाचा उत्साह पाहायला मिळत होता. शेवटच्या दिवशी बाप्पाला तितक्याच उत्साहात निरोप देण्यासाठी भक्तगण सज्ज झाले होते.फलटण शहरातील गणेशाची विसर्जन मिरवणूक काही स्थानिक गणेशभक्तानी पारंपारीक वाद्य, वाजंत्रीच्या तालावर काढली तर काही स्थानिक गणेशभक्तानी डॉल्बीच्या तालावर काढली होती. त्यात महिलांनी मोठ्या प्रमाणात सहभाग घेतला होता. शहरातील नीरा उजवा कालवा गणेश मूर्तींचे विसर्जन करण्यात आले.
कॅनॉल परिसरात मोठ्या गणपती मूर्ती विसर्जन करण्यासाठी क्रेनची व्यवस्था करण्यात आली होती. नाना पाटील चौक येथे निरा उजवा कालवा पूल याठिकाणी आग्निशामक, क्रेन याची सोय करण्यात आली होती.शहर परिसरातील आणि तालुक्यातील गणेश विसर्जनही डॉल्बी, पारंपरिक वाद्य,ढोल लेजिम,टाळ- मृदुंगच्या गजरात भक्तीभावाने गणेशमूर्तींचे विसर्जन करण्यात आले.
फलटण शहरातील शुक्रवार पेठ तालीम गणेशोत्सव मंडळ, रविवार पेठ तालीम गणेशोत्सव मंडळ, उमाजी नाईक गणेशोत्सव मंडळ,सार्वजनिक गणेशोत्सव मंडळ गजानन चौक,अमरज्योति गणेशोत्सव मंडळ, स्वामी विवेकनंद गणेशोत्सव मंडळ, मलठन गणेशोत्सव मंडळ,नवचैतन्य गणेशोत्सव मंडळ, मारवाड़पेठ गणेशोत्सव मंडळ,झुंझार गणेशोत्सव मंडळ, दगडीचाळ गणेशोत्सव मंडळ, जयहिंद गणेशोत्सव मंडळ,नेहरु गणेशोत्सव मंडळ आदी मंडळानी मिरवणुकीत आकर्षक देखावे सादर केले होते देखावे बघायला नागरिकांनी मोठ्या प्रमाणात गर्दी केली होती.
नगर परिषद प्रशासनाच्या वतीने मुख्यधिकारी निखिल मोरे यांनी शहरात गणेश विसर्जनाच्या अनुषंगाने विविध उपयोजना केल्या होत्या. उपविभागीय पोलीस अधिकारी विशाल खांबे व शहर पोलीस निरीक्षक हेमंत शहा यांच्या मार्गदर्शनाखाली मोठया संख्येने शहरात पोलीस बंदोबस्त ठेवण्यात आला होता तर ग्रामीण पोलीस ठाण्याचे पोलीस निरीक्षक सुनील महाडिक यांनी ग्रामीण भागात पोलीस बंदोबस्त ठेवला होता.महावितरण चे अतिरिक्त कार्यकारी अभियंता बी.आर.लोंढे यांच्या मार्गर्शनाखाली शाखा अभियंता रवींद्र ननवरे व दिनेश जोनवाल यांनी गणेश विसर्जन मिरवणुकीसाठी मिरवणूक मार्गावर वेगवेगळ्या ठिकाणी कर्मचारी यांची नेमणूक करण्यात आली होती.
मिरवणूक मार्गावर अडथळा ठरणाऱ्या वीज वाहिन्या यापूर्वीच बाजूला करण्यात आल्या होत्या. एकंदरीतच फलटण शहरासह तालुक्यात भावपूर्ण वातावरणात, ढोल-ताशांच्या गजरात गणेश भक्तांनी गणरायाला पुढच्या वर्षी लवकर येण्याचे निमंत्रण देत निरोप दिला गेला.
