फलटण येथील यशवंत बँकेवर ‘ ईडी ‘ ची छापेमारी; बँकेत ११२ कोटी रुपयांचा आर्थिक गैरव्यवहार

महाराष्ट्र माझा न्युज नेटवर्क

विक्रम विठ्ठल चोरमले

फलटण:- येथील यशवंत बँकेतील कथित ११२ कोटी रुपयांच्या आर्थिक गैरव्यवहार प्रकरणी सक्तवसुली संचालनालयाने (ईडी) मंगळवार दिनांक २३ रोजी मोठी कारवाई करत फलटण बँकेच्या फलटण येथील मुख्य कार्यालयात व कराड शहरात पाच वेगवेगळ्या ठिकाणी छापे टाकले असल्याची माहिती मिळत आहे.

आर्थिक गैरव्यवहार प्रकरणी सक्तवसुली संचालनालयाने (ईडी) ११२ कोटी रुपयांचा आर्थिक गैरव्यवहार प्रकरणी केलेल्या कारवाईदरम्यान अनेक महत्त्वाची कागदपत्रे याच्यासह याप्रकरणी दोन जणांना चौकशीसाठी ताब्यात घेण्यात आल्याची माहिती मिळत आहे.यशवंत बँकेतील आर्थिक गैरव्यवहार प्रकरणी दिनांक १२ ऑक्टोबर रोजी कराड शहर पोलीस ठाण्यात बँकेचे माजी अध्यक्ष शेखर चरेगावकर यांच्यासह ५० जणांविरोधात गुन्हा दाखल करण्यात आला आहे.

सनदी लेखापाल मंदार देशपांडे यांनी ही फिर्याद दिली आहे. या प्रकरणाचा तपास आर्थिक गुन्हे शाखा (EOW) आणि ईडी संयुक्तपणे करत असून, यापैकी २२ आरोपींचे अटकपूर्व जामीन अर्ज न्यायालयाने फेटाळले आहेत.दाखल फिर्यादीनुसार, २०१४ ते २०२५ या कालावधीत बँकेच्या व्यवहारांचे वैधानिक लेखापरीक्षण करताना मोठ्या प्रमाणात आर्थिक अनियमितता आढळून आल्याचा दावा करण्यात आला आहे. त्यामध्ये बोगस कर्ज प्रकरणे, बनावट कागदपत्रांच्या आधारे कर्जवाटप, तारण न घेता कर्ज मंजुरी, निधीचा गैरवापर, तसेच जुनी थकबाकी खाती बंद दाखवून नवीन खाती उघडून निधी अन्य व्यक्तींकडे वळवण्यात आल्याचे आरोप नमूद आहेत.

याच अनुषंगाने ईडीकडून कागदपत्रांची तपासणी आणि चौकशी सुरू असल्याची चर्चा आहे.सदरच्या कारवाईत दोघांना ताब्यात घेऊन चौकशी करण्यात येत असून, एकाला फलटण येथे नेऊन तपास करण्यात आल्याची माहिती मिळत आहे. ईडीकडून त्यांचे बंधू शार्दुल उर्फ मुकुंद चरेगावकर यांच्यासह दोन जणांकडून माहिती घेण्यात आल्याचे समजते. मात्र, याबाबत ईडीकडून अधिकृत दुजोरा मिळालेला नाही. ईडीची ही कारवाई सुरू असल्याने फलटण तालुक्यासह संपूर्ण जिल्ह्यात खळबळ उडाली आहे.

यशवंत बँकेतील घोटाळाप्रकरणी कराड शहर पोलिसात काही महिन्यांपूर्वीच संचालक, बँकेतील अधिकाऱ्यांसह अनेकांवर गुन्हे दाखल झाले आहेत. या प्रकरणात ईडीने मंगळवारी पहाटेपासून छापासत्र सुरू केले आहे. बँकेच्या फलटण येथील मुख्य कार्यालयातही पथकाकडून छापा टाकण्यात आला. तेथून काही कागदपत्र ताब्यात घेण्यात आली आहेत. तर कराडात काहीजणांना या पथकाने ताब्यात घेतल्याची माहिती मिळत आहे.