ओपीडी नंबरसाठी ३ ते ४ महिन्यांची प्रतीक्षा; “पैसे दिले की तात्काळ अपॉइंटमेंट?” नागरिकांत संताप
महाराष्ट्र माझा न्यूज नेटवर्क
दिनांक २७ मे २०२६
फलटण – फलटण शहरातील एका नामांकित खासगी रुग्णालयातील ओपीडी व्यवस्थापनाबाबत गंभीर प्रश्न उपस्थित होऊ लागले आहेत. सर्वसामान्य रुग्णांना उपचारासाठी नंबर मिळवण्यासाठी तब्बल तीन ते चार महिने प्रतीक्षा करावी लागत असल्याचे सांगितले जात असताना, दुसरीकडे आर्थिक देवाणघेवाण किंवा ‘विशेष ओळख’ वापरून काही रुग्णांना तात्काळ अपॉइंटमेंट मिळत असल्याची जोरदार चर्चा शहरात रंगू लागली आहे.
या प्रकारामुळे आरोग्यसेवेतील पारदर्शकता, नैतिकता आणि रुग्णांप्रती असलेली जबाबदारी यावरच प्रश्नचिन्ह निर्माण झाले आहे. “रुग्णालयात खरोखरच एवढा रुग्णभार आहे का, की मुद्दाम मोठी वेटिंग दाखवून रुग्णालयाची ‘डिमांड’ आणि प्रतिमा वाढवण्याचा प्रकार सुरू आहे?” असा संतप्त सवाल आता नागरिकांकडून उपस्थित केला जात आहे.
गंभीर रुग्णांना महिन्यांची प्रतीक्षा
आरोग्याशी संबंधित समस्या या अनेकदा तातडीच्या असतात. मात्र अशा परिस्थितीतही काही रुग्णांना “तीन महिन्यांनंतर या”, “चार महिन्यांनी नंबर मिळेल” अशी उत्तरे दिली जात असल्याची माहिती समोर येत आहे. अनेक रुग्ण हे वेदना, मानसिक ताण आणि आर्थिक अडचणी सहन करत उपचाराच्या प्रतीक्षेत राहतात व मिळेल त्या दिवसाचा नंबर घेतात. परंतु त्याच वेळी “विशेष माध्यम” वापरल्यास काही तासांत किंवा काही दिवसांत अपॉइंटमेंट मिळत असल्याच्या चर्चेमुळे सर्वसामान्य नागरिकांमध्ये तीव्र नाराजी निर्माण झाली आहे.
‘वेटिंग’ हा उपचाराचा भाग की मार्केटिंगचा?
शहरात आता एक मोठा प्रश्न चर्चिला जात आहे की खरंच ‘वेटिंग’ हा उपचाराचा भाग की मार्केटिंगचा “खरोखरच रुग्णांची संख्या एवढी प्रचंड आहे, की कृत्रिमरीत्या मोठी वेटिंग दाखवून रुग्णालयाची लोकप्रियता वाढवण्याचा प्रयत्न केला जात आहे?”काही नागरिकांचे म्हणणे आहे की, “मोठमोठी वेटिंग दाखवली की डॉक्टरांची प्रतिमा अधिक मोठी असल्याचा समज निर्माण होतो. त्यामुळे लोकांमध्ये ‘इतकी गर्दी म्हणजे डॉक्टर चांगलेच असणार’ असा मानसशास्त्रीय प्रभाव पडतो.” जर असे प्रकार प्रत्यक्षात घडत असतील, तर तो केवळ अनैतिकच नव्हे तर रुग्णांच्या भावनांशी आणि आरोग्याशी खेळ करणारा प्रकार ठरू शकतो.
आर्थिक देवाणघेवाणीच्या चर्चांनी संशय अधिक गडद
काही रुग्ण व नातेवाईकांकडून नाव न छापण्याच्या अटीवर धक्कादायक दावे करण्यात येत आहेत. “सामान्य पद्धतीने गेल्यास महिन्यांची वेटिंग सांगितली जाते; मात्र मध्यस्थ, कर्मचारी किंवा ओळखीच्या माध्यमातून आर्थिक व्यवहार झाल्यास नंबर पटकन मिळतो,” असा आरोप काहींनी केला आहे.जर या आरोपांमध्ये तथ्य आढळले, तर हा प्रकार आरोग्य व्यवस्थेवरील विश्वास डळमळीत करणारा ठरू शकतो. गरीब आणि सामान्य रुग्णांना महिन्यांची प्रतीक्षा आणि पैशांच्या बळावर काहींना तात्काळ सेवा अशी दुहेरी व्यवस्था सुरू आहे का, याची चौकशी होणे आवश्यक असल्याची मागणी आता जोर धरू लागली आहे.
प्रशासन आणि आरोग्य विभागाने लक्ष घालण्याची मागणी
या संपूर्ण प्रकरणाची सखोल चौकशी करून ओपीडी नंबर वाटप प्रक्रिया पारदर्शक करावी, प्रतीक्षा यादी सार्वजनिक करावी, तसेच आर्थिक व्यवहाराच्या तक्रारींची तपासणी करावी, अशी मागणी नागरिकांकडून होत आहे.रुग्णालय प्रशासनानेही या आरोपांबाबत स्पष्ट भूमिका मांडून नागरिकांमधील संभ्रम दूर करणे गरजेचे असल्याचे मत व्यक्त केले जात आहे. फलटण शहरात आता एकच चर्चा आहे. “उपचारासाठी खरंच चार महिने थांबावं लागतं, की पैशांनी आणि ओळखीने आरोग्यसेवेचे दरवाजे लगेच उघडतात?”
