अजित पवारांच्या निधनानंतर पहिलीच निवडणूक; पुरुषोत्तम जगताप यांच्या पॅनलचा धुव्वा, बारामतीत विजयी जल्लोष
महाराष्ट्र माझा न्यूज नेटवर्क
बारामती : सोमेश्वर सहकारी साखर कारखान्याच्या निवडणुकीत उपमुख्यमंत्री सुनेत्रा पवार यांच्या पॅनलने ऐतिहासिक यश मिळवत २१ पैकी २१ जागांवर विजयाची मोहोर उमटवली. या एकतर्फी निकालामुळे कारखान्याच्या राजकारणात सुनेत्रा पवार गटाचे वर्चस्व पुन्हा एकदा ठळकपणे समोर आले असून, विरोधी पॅनलला मोठ्या पराभवाला सामोरे जावे लागले आहे.
दिवंगत अजित पवार यांच्या निधनानंतर सुनेत्रा पवार यांनी प्रथमच निवडणुकीची जबाबदारी स्वीकारली होती. त्यामुळे या निवडणुकीकडे केवळ सहकार क्षेत्रातील लढत म्हणून नव्हे, तर बारामतीच्या राजकीय समीकरणांच्या दृष्टीनेही पाहिले जात होते. निकालाने सुनेत्रा पवार यांच्या नेतृत्वाखालील पॅनलला सभासदांचा भक्कम पाठिंबा मिळाल्याचे चित्र स्पष्ट केले.मतमोजणी सुरू असतानाच सुनेत्रा पवार यांच्या पॅनलच्या उमेदवारांनी आघाडी घेतली होती.
संग्राम सोरटे, प्रमोद काकडे, अभिजीत काकडे आणि वसंतराव दगडे यांच्या विजयाने कार्यकर्त्यांमध्ये उत्साह संचारला. त्यानंतर उर्वरित जागांचे निकाल जाहीर होताच संपूर्ण २१ जागांवर विजय मिळाल्याचे स्पष्ट झाले. बारामतीत कार्यकर्त्यांनी गुलालाची उधळण करत आनंदोत्सव साजरा केला.कारखान्याचे विद्यमान अध्यक्ष पुरुषोत्तम जगताप यांच्या पॅनलला या निवडणुकीत अपेक्षित यश मिळवता आले नाही.
जगताप यांनाही पराभवाचा सामना करावा लागल्याने त्यांच्या नेतृत्वाला मोठा धक्का बसल्याचे मानले जात आहे. दुसरीकडे, सुनेत्रा पवार यांच्या पॅनलने सर्व जागा जिंकत विरोधकांना एकही जागा मिळू दिली नाही.विजयानंतर अभिजीत काकडे यांनी प्रसारमाध्यमांशी संवाद साधला. त्यांनी या विजयाचे श्रेय सुनेत्रा पवार, पार्थ पवार आणि जय पवार यांना दिले.
सुनेत्रा पवार यांनी प्रचारात घेतलेला सक्रिय सहभाग आणि कार्यकर्त्यांनी केलेली मेहनत यामुळे विजय मिळाल्याची भावना समर्थकांकडून व्यक्त करण्यात आली.या निकालामुळे सोमेश्वर कारखान्याच्या आगामी कारभाराबाबत अपेक्षा वाढल्या आहेत. ऊस उत्पादक शेतकऱ्यांचे प्रश्न, कारखान्याची आर्थिक स्थिती, सभासदांचे हित आणि व्यवस्थापनातील पारदर्शकता या मुद्द्यांवर नव्या संचालक मंडळाची भूमिका महत्त्वाची ठरणार आहे.
२१ पैकी २१ जागांवर मिळवलेल्या विजयामुळे सुनेत्रा पवार यांच्या नेतृत्वाला मोठे बळ मिळाले आहे. आता या विजयाचे रूपांतर कारखान्याच्या प्रभावी आणि सभासदाभिमुख कारभारात कसे होते, याकडे ऊस उत्पादक शेतकरी आणि सभासदांचे लक्ष लागले आहे.
