हिरवी दिसणारी पिकेही पाण्याअभावी नुकसानग्रस्त असल्याचा दावा; शेतसारा, वीजबिल व शैक्षणिक शुल्क माफ करण्याची मागणी
महाराष्ट्र माझा न्यूज नेटवर्क
फलटण : शासनाने फलटण तालुक्यात दुष्काळ जाहीर केल्याचे सांगितले जात असताना, प्रत्यक्षात शेतकऱ्यांना अद्याप पुरेसा दिलासा मिळालेला नसल्याचा आरोप स्वाभिमानी शेतकरी संघटनेने केला आहे. पावसाच्या दीर्घ खंडामुळे तालुक्यातील विविध पिकांचे मोठ्या प्रमाणावर नुकसान झाले असून, प्रत्येक गावात आणि प्रत्येक शेतकऱ्याच्या बांधावर जाऊन सरसकट पीक पंचनामे करावेत, अशी मागणी संघटनेने केली आहे. यासंदर्भात ९ ऑक्टोबर २०२६ रोजी संघटनेच्या पदाधिकाऱ्यांनी फलटणचे तहसीलदार अभिजित जाधव यांना निवेदन दिले.
संघटनेच्या म्हणण्यानुसार, पेरणीनंतर पावसाने दीर्घकाळ दडी मारल्यामुळे सोयाबीन, कापूस, बाजरी, मका, कांदा आणि ऊस या पिकांचे मोठे नुकसान झाले आहे. काही भागांत पिके वरून हिरवी दिसत असली, तरी जमिनीतील ओलावा संपल्याने आणि पाण्याअभावी पिकांची वाढ, दाणे भरण्याची प्रक्रिया आणि उत्पादनक्षमता प्रभावित झाली आहे. तालुक्यात सरासरी ७० टक्क्यांहून अधिक नुकसान झाल्याचा दावा संघटनेने केला असून, काही ठिकाणी नुकसान १०० टक्क्यांपर्यंत असल्याचे निवेदनात नमूद केले आहे.
केवळ काही निवडक गावांतील पंचनामे करून अहवाल पाठविल्यास अनेक नुकसानग्रस्त शेतकरी मदतीपासून वंचित राहण्याची शक्यता असल्याचे संघटनेने म्हटले आहे. त्यामुळे प्रत्यक्ष शेतात जाऊन पिकांची परिस्थिती तपासावी आणि नुकसानग्रस्त क्षेत्राचे वस्तुनिष्ठ मूल्यांकन करावे, अशी मागणी करण्यात आली आहे.
स्वाभिमानी शेतकरी संघटनेच्या आठ प्रमुख मागण्या
संघटनेने तहसीलदारांना दिलेल्या निवेदनातून आठ प्रमुख मागण्या मांडल्या आहेत. त्यामध्ये प्रत्येक गावातील प्रत्येक शेतकऱ्याच्या शेतावर जाऊन पंचनामे करणे, जळालेल्या पिकांसोबत हिरवी दिसणारी; मात्र पाण्याअभावी नुकसान झालेली पिकेही पंचनाम्यात समाविष्ट करणे आणि दुष्काळग्रस्त शेतकऱ्यांना भरघोस आर्थिक मदत देणे यांचा समावेश आहे.
याशिवाय शेतसारा, कृषी पंपांचे वीजबिल आणि विद्यार्थ्यांचे शैक्षणिक शुल्क पूर्णपणे माफ करण्याची मागणी करण्यात आली आहे. आमदार, खासदार आणि मंत्र्यांचे मासिक वेतन तसेच माजी लोकप्रतिनिधींचे पेन्शन बंद करून संबंधित निधी शेतकऱ्यांच्या मदतीसाठी वापरण्याची मागणीही संघटनेने केली आहे.
दुष्काळाच्या पार्श्वभूमीवर जनावरांसाठी पाणी व चाऱ्याची व्यवस्था करावी, तसेच भविष्यातील संकट टाळण्यासाठी सिंचन आणि जलसंधारणाचे दीर्घकालीन नियोजन करावे, अशी मागणी करण्यात आली आहे. मोबाईल ॲपद्वारे नोंदविलेली पीकपाणी सातबारा उताऱ्यावर दिसत नसल्याच्या तक्रारींची दखल घेऊन संबंधित नोंदी ४८ तासांत अद्ययावत कराव्यात, अशी मागणीही निवेदनात करण्यात आली आहे.
मागण्यांवर कार्यवाही न झाल्यास आंदोलनाचा इशारा
दुष्काळामुळे आर्थिक संकटात सापडलेल्या शेतकऱ्यांना तातडीने मदत मिळणे आवश्यक असल्याचे संघटनेने म्हटले आहे. सरसकट पंचनामे करून नुकसानग्रस्त शेतकऱ्यांना योग्य नुकसानभरपाई द्यावी आणि निवेदनातील मागण्यांवर तातडीने कार्यवाही करावी; अन्यथा तीव्र आंदोलन छेडण्यात येईल, असा इशारा संघटनेच्या वतीने देण्यात आला.
या वेळी स्वाभिमानी शेतकरी संघटनेचे सातारा जिल्हाध्यक्ष धनंजय महामुलकर, फलटण तालुकाध्यक्ष नितीन यादव, युवक राज्य प्रवक्ते प्रमोद गाडे, जिल्हा सरचिटणीस डॉ. रवींद्र घाडगे, शहराध्यक्ष विक्रम पवार, किसन शिंदे, बाबा कोकरे यांच्यासह अन्य कार्यकर्ते उपस्थित होते.
दुष्काळग्रस्त भागातील प्रत्यक्ष पीकस्थितीची पाहणी करून नुकसानग्रस्त शेतकऱ्यांचे पंचनामे आणि मदतीची प्रक्रिया कितपत वेगाने पूर्ण होते, याकडे आता फलटण तालुक्यातील शेतकऱ्यांचे लक्ष लागले आहे.
