फलटण :- येथील ग्रामदैवत श्रीराम रथोत्सव प्रतिवर्षाप्रमाणे पारंपारिक पध्दतीने साजरा होणार असून सोमवार दि. २ डिसेंबर हा या रथोत्सवातील मुख्य दिवस आहे. या रथोत्सवाची व्यवस्था नाईक निंबाळकर देवस्थाने व इतर चॅरिटीज ट्रस्ट आणि फलटण नगर परिषद यांच्यावतीने पाहिली जाते.
श्रीराम रथोत्सवाच्या पार्श्‍वभूमीवर आज बुधवार दि. २७ नोव्हेंबर पासून श्रीराम मंदिर परिसरात दररोज रात्री ९ ते ११ या वेळेत प्रभावळ, अंबारी, शेष, गरुड आणि मारुती या ५ वाहनांद्वारे परंपरागत पद्धतीने मिरवणूक काढण्यात येणार आहे. आज बुधवार दि. २७ नोव्हेंबर रोजी ह्या मिरवणुकांना सुरुवात झाली आहे. प्रतिवर्षी ही वाहने व मिरवणूक पाहण्यासाठी व दर्शनासाठी मंदिरात भाविकांची मोठी गर्दी होते.
येथील ऐतिहासिक श्रीराम रथोत्सव प्रतिवर्षी प्रमाणे यंदाही पारंपरिक पद्धतीने साजरा होणार आहे. मार्गशीर्ष शुध्द प्रतिपदा सोमवार दि. २ डिसेंबर हा या यात्रेचा मुख्य दिवस आहे. या दिवशी सकाळी ८ वाजता प्रभू श्रीरामाची मूर्ती रथामध्ये ठेवण्यात येईल त्यानंतर रथ सोहळा परंपरागत मार्गाने शहरातील मिरवणूकीसाठी मार्गस्थ होईल. श्रीरामाचा रथ नगर प्रदक्षिणेसाठी परंपरागत मार्गाने नगर प्रदक्षिणा पूर्ण करुन सायंकाळी ७ वाजता रथसोहळा मंदिरात परत येईल.
रविवार दि.१ डिसेंबर रोजी सकाळी ९ ते ११ या वेळेत प्रभू श्रीरामाच्या रथाला लघुरुद्राभिषेक करण्यात येणार आहे.सोमवार दि. २ डिसेंबर रोजी सकाळी ७ ते ८ या वेळेत श्रीराम मंदिरात कीर्तन झाल्यानंतर प्रभू रामचंद्राची मूर्ती राज घराण्यातील मान्यवरांच्या हस्ते रथामध्ये ठेवण्यात येणार आहे. त्यानंतर शुक्रवार दि.६ डिसेंबर रोजी श्रींची पाकाळणी, सकाळी काकड आरती आणि नंतर ११ ब्राह्मणांच्याकडून लघुरुद्र व महापूजा झाले नंतर या यात्रेची सांगता होणार आहे.
या परंपरागत रथसोहळ्याच्या निमित्ताने शहरात मोठ्या प्रमाणावर रामरथयात्रा भरते या यात्रेसाठी विविध प्रकारची दुकाने त्यामध्ये मेवामिठाई व महिलांची आभूषणे तसेच लहान मुलांच्या खेळण्यांच्या दुकानांचा समावेश असतो तेथे खरेदीसाठी भाविक गर्दी करतात त्याचप्रमाणे सोहळा शहरातून फिरत असतानाही भाविक दर्शनासाठी या सोहळ्यात सहभागी होतात. यात्रेनिमित्त मोठमोठी खेळण्यांची दुकाने तसेच करमणूकीचे स्टॉल्सही लागतात.
श्रीराम मंदिर आणि परिसरासह रथ मार्गावर नगर परिषद नेहमी स्वच्छता आणि पिण्याच्या पाण्याची व्यवस्था करते, पोलिस यंत्रणेच्या माध्यमातून सर्वत्र चोख पोलिस बंदोबस्त ठेवण्यात येतो.नाईक निंबाळकर राजघराण्यातील साध्वी श्रीमंत सगुणामाता आईसाहेब महाराज यांनी सुमारे २६० वर्षांपूर्वी रथयात्रेची ही प्रथा सुरु केली असून आजही परंपरागत पध्दतीने सुरु आहे. दरवर्षी मार्गशीर्ष शुध्द प्रतिपदेला म्हणजे देवदिवाळीच्या दिवशी प्रभू श्री रामाची सजविलेल्या रथातून नगर प्रदक्षिणा होते.
