अन्न व औषध प्रशासनाच्या कारवाईची गरज; नागरिकांच्या आरोग्याचा प्रश्न ऐरणीवर
महाराष्ट्र माझा न्यूज नेटवर्क
फलटण : फलटण तालुक्यात बोगस पनीरच्या विक्रीबाबत चर्चा सुरू असून, अनेक हॉटेल्स, फास्टफूड सेंटर, ढाबे आणि किरकोळ विक्रेत्यांकडे कृत्रिम किंवा निकृष्ट दर्जाच्या पनीरचा वापर होत असल्याची शंका व्यक्त केली जात आहे. वाढती मागणी, कमी उत्पादन खर्च आणि अधिक नफा मिळविण्याच्या उद्देशाने काही विक्रेते बनावट पनीरचा पुरवठा करत असल्याचे बोलले जात आहे.
त्यामुळे नागरिकांच्या आरोग्याचा गंभीर प्रश्न निर्माण झाला आहे.पनीर हे दूधापासून तयार होणारे प्रथिनयुक्त खाद्यपदार्थ मानले जाते. मात्र काही ठिकाणी दूधाऐवजी स्किम्ड मिल्क पावडर, स्टार्च, सिंथेटिक रसायने किंवा इतर घटकांचा वापर करून बनावट पनीर तयार केले जात असल्याचे विविध ठिकाणी उघड झाले आहे.असे
पनीर दिसायला आणि चवीला साधारण पनीरसारखे वाटत असले तरी त्याचा आरोग्यावर विपरीत परिणाम होऊ शकतो.फलटण तालुक्यातील काही नागरिकांनी व ग्राहक संघटनांनी अन्न व औषध प्रशासनाकडे तपासणीची मागणी केली आहे.विशेषतः
मोठ्या प्रमाणात पनीर वापरणाऱ्या हॉटेल्स, खानावळी, कॅटरिंग व्यवसाय आणि दुग्धजन्य पदार्थ विक्री केंद्रांची अचानक तपासणी करून नमुने प्रयोगशाळेत पाठविण्याची आवश्यकता व्यक्त होत आहे.तज्ज्ञांच्या मते, निकृष्ट किंवा बनावट पनीर खाल्ल्याने पोटाचे विकार, अन्नविषबाधा, पचनसंस्थेचे आजार तसेच दीर्घकालीन आरोग्य समस्या उद्भवू शकतात.
त्यामुळे ग्राहकांनीही पनीर खरेदी करताना गुणवत्ता, उत्पादकाची माहिती आणि किंमत याबाबत सतर्क राहणे आवश्यक आहे.दरम्यान, तालुक्यात बोगस पनीरचा पुरवठा नेमका कुठून होतो, त्यामागे कोणते रॅकेट कार्यरत आहे का, याबाबत अधिकृत माहिती समोर आलेली नसली तरी प्रशासनाने तातडीने व्यापक तपासणी मोहीम हाती घेण्याची मागणी जोर धरत आहे.
फलटण तालुक्यातील नागरिकांचा आता एकच प्रश्न आहे “बोगस पनीरचा काळाबाजार नेमका कधी थांबणार?” अन्नसुरक्षेशी संबंधित या गंभीर विषयाकडे संबंधित यंत्रणांनी तातडीने लक्ष देण्याची गरज व्यक्त होत आहे.
